Operacion i madh kundër krimit të organizuar në Kosovë, përfshihen Europol dhe autoritetet e disa shteteve evropiane

Policia e Kosovës, nën monitorimin e Prokurorisë Speciale dhe në bazë të urdhëresës së Gjykatës Themelore në Prishtinë, ka nisur sot një operacion të gjerë kundër krimit të organizuar në disa lokacione në vend.
Sipas njoftimit zyrtar, operacioni është i lidhur me dyshimet për trafikim ndërkombëtar të substancave narkotike dhe përfshin hetime për veprat penale si: pjesëmarrja ose organizimi i grupit kriminal të organizuar, blerja, posedimi, shpërndarja dhe shitja e paautorizuar e narkotikëve, si dhe pastrimi i parave.
Në këtë aksion po marrin pjesë edhe përfaqësues të EUROPOL, si dhe autoritete nga Belgjika, Franca dhe Holanda.
Prokuroria Speciale dhe Policia e Kosovës kanë bërë të ditur se pas përfundimit të operacionit policor, do të dalin me një komunikatë të përbashkët për informimin e publikut mbi rezultatet dhe detajet e aksionit.
Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.