Numri i personave që u vendosën në Gjermani gjatë vitit 2025 ka pësuar një rënie të konsiderueshme krahasuar me vitin paraprak. Sipas të dhënave të publikuara nga Zyra Federale e Statistikave e Gjermanisë, rreth 1.48 milionë persona imigruan në vend gjatë vitit të kaluar, që paraqet një ulje prej 13 për qind krahasuar me vitin 2024.
Ndërkohë, numri i personave që u larguan nga Gjermania ra me rreth 2 për qind, duke arritur në 1.25 milionë persona.
Si rezultat, migrimi neto – diferenca mes personave që hynë dhe atyre që dolën nga vendi – u llogarit në rreth 235 mijë persona. Kjo shifër është 45 për qind më e ulët krahasuar me vitin paraprak, kur migrimi neto kishte arritur në rreth 430 mijë persona.
Më pak azilkërkues nga Siria, Afganistani dhe Ukraina
Sipas statistikave zyrtare, një nga arsyet kryesore të rënies së imigrimit është ulja e numrit të azilkërkuesve nga vendet që tradicionalisht kanë qenë burimet kryesore të migrimit drejt Gjermanisë.
Migrimi neto nga Siria ka rënë me 67 për qind, ndërsa ai nga Afganistani me 41 për qind. Gjithashtu është regjistruar një rënie prej 21 për qind e ardhjeve nga Ukraina.
Autoritetet gjermane theksojnë se më pak persona kanë ardhur edhe nga vendet e tjera anëtare të Bashkimit Evropian, duke ndikuar në uljen e përgjithshme të fluksit migrator.
Më shumë gjermanë po largohen nga vendi
Të dhënat tregojnë gjithashtu se gjatë vitit 2025 më shumë shtetas gjermanë janë larguar nga vendi sesa janë kthyer.
Sipas raportit, rreth 97 mijë gjermanë më shumë u larguan nga Gjermania sesa u rikthyen, krahasuar me 81 mijë në vitin paraprak.
Destinacionet më të preferuara për qytetarët gjermanë që u larguan ishin:
- Zvicra – rreth 23 mijë persona
- Austria – rreth 14 mijë persona
- Spanja – rreth 10 mijë persona
Brandenburgu fiton banorë, Berlini humbet më shumë
Lëvizjet e brendshme të popullsisë mes landeve federale kanë mbetur pothuajse të pandryshuara. Gjatë vitit 2025 u regjistruan afërsisht 996 mijë zhvendosje brenda Gjermanisë.
Brandenburgu ishte landi që fitoi më shumë banorë, me një rritje neto prej rreth 9 mijë personash. Pas tij renditen Bavaria dhe Schleswig-Holstein, secila me rreth 8 mijë banorë më shumë.
Në anën tjetër, Berlini shënoi humbjen më të madhe të popullsisë, pasi rreth 12 mijë persona më shumë u larguan nga kryeqyteti sesa u vendosën atje. Humbje të popullsisë u regjistruan edhe në Tyringi dhe në Nordrhein-Westfalen.
Sipas ekspertëve, këto zhvillime tregojnë një ngadalësim të trendit të migrimit drejt Gjermanisë, ndërsa ndryshimet ekonomike, demografike dhe politikat e migracionit vazhdojnë të ndikojnë në lëvizjet e popullsisë brenda dhe jashtë vendit.
