Numri i qytetarëve që jetojnë në kushte varfërie në Gjermani po vijon të rritet, duke arritur nivelet më të larta që nga viti 2020. Sipas një analize të fundit nga Shoqata për Mirëqenie dhe Barazi (Paritätische Gesamtverband), përqindja e popullsisë së prekur ka shkuar në 16.1% gjatë viteve 2024–2025.
Kjo paraqet një rritje prej 0.6 pikë përqindje krahasuar me periudhën paraprake, ndërsa në total rreth 13.3 milionë njerëz në vend konsiderohen se jetojnë në varfëri, në bazë të të ardhurave të tyre.
Të dhënat tregojnë se grupet më të cenueshme mbeten prindërit e vetëm, personat që jetojnë të vetmuar dhe të moshuarit, të cilët përballen më shpesh me mungesë të të ardhurave të mjaftueshme për të përballuar kostot e jetesës.
Sipas standardeve të përdorura në Gjermani, një person klasifikohet në rrezik varfërie nëse të ardhurat e tij janë nën 60% të mesatares kombëtare. Në praktikë, kjo nënkupton më pak se 1,446 euro neto në muaj për një individ, ndërsa për një familje me dy të rritur dhe dy fëmijë nën 14 vjeç, kufiri është 3,036 euro neto në muaj.
Rritja e këtyre shifrave po ngre shqetësime për thellimin e pabarazive sociale dhe nevojën për politika më efektive mbështetëse për shtresat më të prekura të shoqërisë./kudoshqip.com/
