Policia spanjolle arrestoi Jonathan Andic, djalin e themeluesit të markës së famshme botërore të modës Mango, Isaac Andic. Arrestimi erdhi si pjesë e një hetimi për vdekjen e dyshimtë të babait të tij, i cili u nda nga jeta në dhjetor 2024 pasi ra nga një shkëmb pranë Barcelonës.
Autoritetet katalunase kanë konfirmuar se Jonathan Andic po merret në pyetje, ndërsa më shumë detaje nuk janë zbuluar. Edhe vitin e kaluar, pas spekulimeve të para në media rreth hetimit të vdekjes, familja i qëndroi pranë Jonathanit, duke pretenduar se ai është absolutisht i pafajshëm, raporton The Guardian.
Isaac Andic, një nga biznesmenët më të fuqishëm spanjollë, humbi jetën ndërsa po bënte ecje me familjen në malin Montserrat në Katalonjë. Trupi i tij u gjet rrëzë një shkëmbi mbi 100 metra të lartë.
Edhe pse lajmi në vitin 2024 fillimisht u paraqit si një aksident tragjikt, rrjedha e hetimit ndryshoi shpejt. Një njësi speciale e policisë katalunase vuri re mospërputhje të shumta. Ekzaminimi i telefonit të të ndjerit zbuloi mospërputhje në lëvizjet që Jonathan përshkroi në dëshminë e tij, duke bërë që prokuroria të rihapë çështjen si një vrasje të mundshme në tetor 2025.
Isak Andic njihej si “miliarderi më i qetë spanjoll”. I lindur në vitin 1953 në Stamboll në një familje hebraike sefardike, rrënjët e së cilës shkojnë në Selanik, Andic u rrit i rrethuar nga tekstilet. Në vitet 1960, familja u zhvendos në Katalonjë, ku Isaku i ri filloi të shiste këmisha në rrugët e Barcelonës.
Në vitin 1984, ai themeloi Mangon me vëllanë e tij Nahman. Ajo që filloi si një butik i vogël në Barcelonë është rritur në një perandori globale me më shumë se 2,500 dyqane në 110 vende.
Në sytë e publikut spanjoll, Andik ishte homologu i Amancio Ortega-s, themeluesit të Zaras. Megjithatë, ndryshe nga shumë kolegë të tij, Isak shmangte median, festivalet dhe kamerat. Pasuria e tij vlerësohet në 4.5 miliardë dollarë, por ai i ka mbetur besnik një stili jetese modeste, të përkushtuar ndaj detajeve dhe cilësisë.
Në ditën fatale të 14 dhjetorit 2024, Isak dhe Jonathan shkuan për ecje në një shteg që të dy e njihnin mirë. Disa orë më vonë, themeluesi i Mangos vdiq dhe ishte djali i tij që kërkoi ndihmë.
Edhe pse partnerja e Isakut, lojtarja e famshme e golfit Estefania Knuth, konfirmoi versionin e aksidentit në deklaratat e saj të para, hetuesit mblodhën të dhëna në mënyrë diskrete për muaj të tërë. Mospërputhjet në deklaratat e Jonathan Andik, i cili është gjithashtu nënkryetar i kompanisë, u bënë arsyeja kryesore për arrestimin e tij.
Pas vdekjes së Isaac, menaxhimi i kompanisë u mor përsipër nga Tony Ruiz si presidenti i parë jo-familjar, ndërsa Jonathan dhe motrat e tij Judith dhe Sarah ruajtën pozicionet e tyre të larta. Deri më tani, familja ka heshtur plotësisht, duke bërë vetëm deklarata të shkurtra në lidhje me besimin e tyre në sistemin e drejtësisë.
Ndërsa policia katalalunase vazhdon të analizojë telefonatat dhe gjurmët gjeografike të lëvizjeve në ditën e tragjedisë, fati i njërit prej trashëgimtarëve më të pasur të Spanjës mbetet i pasigurt. Në Katalonjë, Isaac Andik ende kujtohet me respekt të thellë si një vizionar që përcaktoi stilin mesdhetar, por historia e jetës së tij tani ka një anë të errët – misterin e vdekjes së një babai, i dyshuari kryesor i të cilit është djali i tij./Reporteri.net./
