Kiev – Bashkëpunimi ushtarak mes Gjermanisë dhe Ukrainës po hyn në një fazë të re, me fokus në zhvillimin dhe prodhimin e përbashkët të dronëve me rreze veprimi deri në 1,500 kilometra.
Gjatë një vizite zyrtare në Kiev, ministri gjerman i Mbrojtjes, Boris Pistorius, njoftoi se Berlini po intensifikon partneritetet mes kompanive gjermane dhe ukrainase, veçanërisht në sektorin e sistemeve pa pilot. Ai theksoi se projektet e përbashkëta synojnë zhvillimin e dronëve me kapacitete të ndryshme operacionale, duke rritur ndjeshëm potencialin mbrojtës.
Presidenti i Ukrainës, Volodymyr Zelenskyy, bëri të ditur se aktualisht janë në zhvillim gjashtë projekte të përbashkëta me Gjermaninë në industrinë e armatimit. “Ky është vetëm fillimi”, deklaroi ai, duke lënë të hapur mundësinë për zgjerim të mëtejshëm të bashkëpunimit.
Zelenskyy falënderoi Gjermaninë për mbështetjen e vazhdueshme, veçanërisht në forcimin e mbrojtjes ajrore të Ukrainës përballë sulmeve ruse, ndërsa shtoi se nuk do të bëhen publike detaje të mëtejshme. “Le të jetë një surprizë për rusët”, u shpreh ai.
Nga ana e tij, Pistorius vlerësoi rolin në rritje të Ukrainës në arkitekturën e sigurisë, duke theksuar se vendi nuk është më vetëm përfitues, por edhe kontribues aktiv në këtë drejtim.
Në kuadër të këtij bashkëpunimi, Pistorius dhe homologu i tij ukrainas, Mykhailo Fedorov, konfirmuan gjithashtu vazhdimin e trajnimit të forcave ukrainase. Deri më tani, Gjermania ka trajnuar afro 27 mijë ushtarë ukrainas dhe synon ta vijojë këtë mbështetje edhe në periudhën pas një armëpushimi të mundshëm./kudoshqip.com/
