Përpjekjet për t’iu shmangur kontrolleve të shpejtësisë në Zvicër mund të kenë pasoja të kushtueshme për drejtuesit e automjeteve. Autoritetet zvicerane rikujtojnë se përdorimi i pajisjeve që zbulojnë radarët është rreptësisht i ndaluar.
Rasti i fundit përfshin një shtetase nga Gjermania, e cila u gjobit me 100 franga pasi në automjetin e saj u gjet një radar-detektor. Sipas ligjit në Zvicër, këto pajisje janë të paligjshme jo vetëm për përdorim, por edhe për posedim apo importim, pasi konsiderohen se pengojnë zbatimin e rregullave të trafikut.
Megjithëse ndalohen, një investigim i medias zvicerane ka treguar se radar-detektorët mund të blihen lehtësisht online nga jashtë vendit dhe në shumë raste hyjnë në territor pa u zbuluar menjëherë.
Megjithatë, autoritetet doganore paralajmërojnë se në momentin që zbulohen, pajisjet konfiskohen dhe zakonisht asgjësohen, ndërsa pronarët përballen me gjoba. Për këtë arsye, drejtuesve të mjeteve u rekomandohet të respektojnë kufijtë e shpejtësisë dhe të shmangin përdorimin e pajisjeve të tilla të ndaluara.
