Vala e grevave në kompaninë ajrore Lufthansa po vijon të shkaktojë shqetësime të mëdha për pasagjerët, me anulime të shumta fluturimesh dhe paralajmërime për ndërprerje të tjera deri në fundjavë.
Stafi i kabinës ka hyrë sërish në grevë, e cila po zhvillohet gjatë ditës së sotme dhe do të vazhdojë edhe nesër, duke detyruar kompaninë të anulojë qindra fluturime në rrjetin e saj. Situata pritet të rëndohet më tej, pasi sindikata e pilotëve ka bërë thirrje për grevë edhe për ditën e nesërme dhe të premten, duke përfshirë si pilotët e Lufthansa-s, ashtu edhe ata të degës së saj CityLine.
Efektet e kësaj greve nuk do të kufizohen vetëm tek Lufthansa, pasi edhe kompania Eurowings pritet të përballet me ndërprerje të operacioneve.
Ndërkohë, tensionet përkojnë me një moment simbolik për kompaninë, e cila po shënon 100-vjetorin e themelimit. Në kuadër të kësaj ngjarjeje, janë paralajmëruar edhe protesta që do të zhvillohen gjatë ceremonisë zyrtare në Berlin.
Pasagjerët këshillohen të kontrollojnë në kohë reale statusin e fluturimeve dhe të marrin masa alternative për udhëtimet e planifikuara./kudoshqip.com
