Gjermania ka refuzuar kërkesën e presidentit amerikan Donald Trump që vendet e NATO-s të përfshihen në sigurimin ushtarak të Ngushticës së Hormuzit, një nga korridoret më të rëndësishme për transportin global të naftës.
Ministri gjerman i Mbrojtjes, Boris Pistorius, deklaroi se Berlini është i gatshëm të kontribuojë në përpjekje diplomatike për uljen e tensioneve, por nuk do të marrë pjesë në operacione ushtarake në rajon. Ai theksoi gjithashtu se Gjermania nuk ishte konsultuar paraprakisht për sulmet që kanë çuar në përshkallëzimin e situatës me Iranin.
Në të njëjtën linjë u shpreh edhe ministri i Jashtëm, Johann Wadephul, i cili përjashtoi çdo mundësi për përfshirje të Gjermanisë në misione ushtarake për mbrojtjen e kalimeve në Ngushticën e Hormuzit.
“Ne nuk do të marrim pjesë në këtë konflikt,” deklaroi ai.
Më herët, Trump kishte bërë thirrje që vendet anëtare të NATO-s të ndihmojnë në sigurimin e kësaj rruge strategjike detare. Ai paralajmëroi se refuzimi i një mbështetjeje të tillë mund të përbëjë një zhvillim negativ edhe për vetë aleancën.
Sipas Wadephul, objektivi i sulmeve të ndërmarra nga SHBA-ja dhe Izraeli ishte dobësimi i kapaciteteve ushtarake të Iranit, veçanërisht programit të tij bërthamor dhe atij të raketave. Ai shtoi se Gjermania pret informacione të mëtejshme për rezultatet e këtyre operacioneve.
“Pasi të kemi një pasqyrë të qartë të situatës, do të ishim të gatshëm të kontribuonim në procesin e negociatave,” u shpreh ministri.
Sipas tij, stabiliteti dhe siguria në Ngushticën e Hormuzit dhe në Detin e Kuq mund të arrihen vetëm përmes dialogut dhe zgjidhjeve diplomatike./kudoshqip.com/
