Ministrja e Ekonomisë, Artane Rizvanolli, gjatë një qëndrimi zyrtar në Washington, D.C., e shoqëruar nga Ambasadori Dugolli, ka zhvilluar një takim me një grup profesionistësh që punojnë në World Bank dhe në International Monetary Fund (FMN).
Sipas njoftimit zyrtar, në takim u diskutua mbi mundësitë e bashkëpunimit ndërinstitucional, shkëmbimin e përvojave profesionale si dhe angazhimet e përbashkëta për të mbështetur zhvillimin ekonomik. Pjesëmarrësit, me përvojë në fusha të ndryshme të ekonomisë dhe financave ndërkombëtare, ndanë praktikat dhe ekspertizën e tyre lidhur me politikat zhvillimore, reformat strukturore dhe menaxhimin e projekteve strategjike.
Ministrja Rizvanolli theksoi rëndësinë e forcimit të lidhjeve me profesionistët shqiptarë dhe partnerët ndërkombëtarë në institucionet financiare globale, duke vlerësuar kontributin e tyre në avancimin e agjendës së zhvillimit ekonomik.
Takimi u vlerësua si një hap i rëndësishëm drejt thellimit të bashkëpunimit me institucionet financiare ndërkombëtare dhe rritjes së sinergjisë në funksion të zhvillimit të qëndrueshëm ekonomik.