Në një atmosferë festive dhe solemne, me rastin e 18-vjetorit të shpalljes së pavarësisë së Republika e Kosovës, Ambasada e Kosovës në Zvicër organizoi në Bern pritjen tradicionale për korin diplomatik të akredituar, përfaqësues të institucioneve zvicerane dhe personalitete nga fusha e politikës, diplomacisë, kulturës dhe biznesit.
Të pranishëm në këtë ngjarje ishin ambasadorë dhe diplomatë të vendeve të ndryshme të akredituar në Konfederatën Helvetike, përfaqësues të autoriteteve federale dhe kantonale zvicerane, si dhe përfaqësues të diasporës shqiptare në Zvicër.
Në fjalën e tij përshëndetëse, Ambasadori i Kosovës në Zvicër, Mentor Latifi, theksoi rëndësinë historike të 17 shkurtit 2008 si moment kyç në rrugëtimin e shtetndërtimit dhe konsolidimit ndërkombëtar të Kosovës. Ai nënvizoi përparimin e arritur gjatë këtyre 18 viteve në forcimin e institucioneve demokratike, sundimin e ligjit dhe zhvillimin ekonomik.
Ambasadori Latifi shprehu mirënjohje të veçantë për mbështetjen e vazhdueshme të Zvicrës ndaj Kosovës, duke e cilësuar atë si një partner të rëndësishëm strategjik dhe një mik të dëshmuar të popullit të Kosovës. Ai theksoi se marrëdhëniet mes dy vendeve janë ndërtuar mbi bazën e respektit të ndërsjellë, bashkëpunimit të ngushtë dhe lidhjeve të forta njerëzore, të forcuara edhe nga diaspora shqiptare që jeton dhe vepron në Zvicër.
Gjatë pritjes, të ftuarit patën mundësinë të shkëmbejnë urime me rastin e përvjetorit të pavarësisë dhe të diskutojnë për thellimin e mëtejmë të bashkëpunimit në fusha të ndryshme me interes të përbashkët. Programi u shoqërua edhe me elemente kulturore që promovuan traditën dhe identitetin shtetëror të Kosovës.
Organizimi i kësaj pritjeje tradicionale konfirmon përkushtimin e Republikës së Kosovës për forcimin e partneriteteve ndërkombëtare dhe avancimin e bashkëpunimit me shtetet mike, në veçanti me Zvicrën. Foto: albinfo.ch
